Jangan Copek Teraso.

Kito hidup dalam dunio,
Macam-macam ragam manusio,
Semuo ehh tak samo macam kito,
Jangan kito copek teraso.

Yang miskin ado,
Yang kayo pun ado,
Yang miskin pun nak dijago,
Yang kayo kito pun banggo.

Ado kalo kito copek teraso,
Bilo tak jumpo saudaro-maro,
Berkumpullah rumah orang tuo kito,
Baru kito menjadi mesro.

Tak datang orang ke rumah kito,
Bersangko baiklah yang paling utamo,
Ado kalo ehh orang sibuk dengan kojo,
Ado pulo nak berehat dengan keluargo.

Rumah kito pun tak ado yang tibo,
Tapi kito paham keadaan semaso,
Jalan sosak alasan diterimo,
Kadang-kadang orang pun macam kito, maleh nak ke sini sano.

Bilo dijomput kenduri kendaro,
Kito pulak tak peronah tibo,
Alasan eh kito banyak kojo.
Yang menjomput hati mulo teraso.

Kok tak dijomput kito mengato,
Konon ehh tak ado budi bahaso,
Serba salah orang dibueknyo,
Sajo yo kito nak mencipto sengketo.

Rumah kito macam tu jugo,
Datang orang kito tak bersedio,
Nak hidang bondo pun tak ado,
Kesudahan ehh diumpek pulo.

Kalau raso nak buek apo-apo,
Jomput ajo mano yang ado,
Tak payahlah hati teraso,
Susah bilo lain jadinyo.

Jadi jangan kito meraso dihino,
Mengasingkan diri bukan caronyo,
Ado kalo itu kesilapan kito,
Yang tak peronah kito menyangko.

Semuo manusio samo sajo,
Tak ado yang mulio,
Tak ado yang hino,
Di sisi Tuhan lain nilaiannyo.

Kito yang menulih ni pun begito juo,
Kadang hati copek teraso,
Maklumlah, kito ni bukan yang berharto,
Tapi copek-copek kito lupokannyo.

Andai kato kito menjadi orang kayo,
Surok-surokkanlah tak payah nak bercerito,
Sobab yang kayo cumo Yang Maha Eso,
Bersyukur kito ateh pemberiannyo.

Jiko kito kurang berharto,
Jangan pulak teraso dihino,
Sobab banyak hikmah disebaliknyo,
Akhirat besok tak banyak ditanyo.

Jadi jangan kito copek teraso,
Toga dek ghoto dunio,
Semuo ehh tu cumo sementaro,
Yang nak dibawak sok tu deh amalan kito.

Dulu Nabi peronah dihino,
Oleh Yahudi yang buto mato,
Disumpah seranah eh Nabi kito,
Totap jugak Nabi menyuap makanan ke mulutnyo.

Kito ni manusio biaso,
Ada kekurangan, ado kelebihannyo,
Jadi jangan kito copek teraso,
Kan tak elok tu di penghujungnyo.

Kalau berjanji, jangan kito lupo,
Kalau bercerito nak kono jago-jago,
Diumpek koji, itu pokok dek dio,
Dio sendiri yang menanggung doso,

Itulah dio manusio,
Semuo ehh bukannyo samo,
Kok dah ramai, macam-macam peel yang ado,
Tak payahlah kto copek teraso.

Semuo kito ni dah tuo,
Ontah esok, ontah luso ado ko laie umor,
Kok ado kesilapan lamo,
Ni dah rayo, datanglah jumpo.

Ini dah sampai Hari Rayo,
Bermaaf-maafan yang paling utamo,
Baru hidup jadi cerio,
Janganlah kito copek teraso.

"SELAMAT HARI RAYO SEMUO"